‘माझ्या जयश्रीला न्याय द्या’; लेकीच्या संशयास्पद मृत्यूने आई-वडिलांचा आक्रोश...

१८ वर्षांच्या लेकीच्या मृत्यूचे गूढ उकलण्याची मागणी; ‘आमच्या लेकराचा मृत्यू नेमका कसा झाला, याचे सत्य समोर आणा’—पालकांचा टाहो; प्रकरणाची SIT चौकशी करा, या मागणी करीता पालकांचे १५ ऑगस्टपासून अमळनेर प्रांत कार्यालयासमोर आमरण उपोषण सुरू.

अमळनेर | प्रतिनिधी : ज्या वयात लेकीच्या हातावर मेहंदी फुलवण्याची, तिच्या भविष्यासाठी स्वप्ने पाहण्याची वेळ होती, त्याच वयात एका आई-वडिलांच्या कुशीत आपल्या १८ वर्षांच्या मुलीचा निष्प्राण देह आला. ‘आमची जयश्री आम्हाला सोडून गेली, पण तिच्या मृत्यूचे सत्य तरी आमच्यासमोर आणा… तिला न्याय द्या,’ असा हृदय पिळवटून टाकणारा आक्रोश मयत जयश्री संजय संदानशिव हिचे आई-वडील संजय व सोनाली संदानशिव यांनी केला आहे.

गांधली येथील जयश्री संदानशिव हिच्या संशयास्पद मृत्यूची विशेष तपास पथकाद्वारे (SIT) निष्पक्ष, सखोल व स्वतंत्र चौकशी करण्यात यावी, तसेच प्रकरणातील संशयितांच्या भूमिकेची कसून चौकशी करून दोषींवर कठोर कायदेशीर कारवाई करावी, अशी मागणी पालकांनी जिल्हा पोलीस अधीक्षक, जळगाव यांच्याकडे केली आहे.

मागणी मान्य न झाल्यास १५ ऑगस्ट २०२६ पासून अमळनेर प्रांत कार्यालयासमोर संपूर्ण परिवारासह आमरण उपोषण करण्याचा इशाराही त्यांनी दिला होता.

बारावी शिकणारी जयश्री अचानक बेपत्ता… अन् दोन दिवसांनी मृतदेह

जयश्री ही आदर्श विद्यालय, अमळगाव येथे बारावी कला शाखेत शिक्षण घेत होती. पालकांच्या म्हणण्यानुसार, १० डिसेंबर २०२५ रोजी दुपारी सुमारे ४ वाजता ती घरातून निघून गेली. बराच वेळ उलटूनही ती घरी न परतल्याने कुटुंबीयांच्या काळजात धडकी भरली. तिचा सर्वत्र शोध घेतल्यानंतर अमळनेर पोलीस ठाण्यात मिसिंग नोंद करण्यात आली.

मात्र, दोन दिवसांनी म्हणजेच १२ डिसेंबर रोजी गांधली शिवारातील एका शेतातील विहिरीत जयश्रीचा मृतदेह आढळला. एका क्षणात संपूर्ण कुटुंबाचे जगच उद्ध्वस्त झाले.

लेकीला गमावण्याचे दुःख एका बाजूला आणि ‘आपल्या मुलीचा मृत्यू नेमका कसा झाला?’ हा अनुत्तरित प्रश्न दुसऱ्या बाजूला, अशा दुहेरी वेदनेतून हे कुटुंब आजही जात आहे.

‘आम्हाला न समजावता सह्या घेतल्या’; पालकांचा पोलिसांवर गंभीर आरोप

जयश्रीच्या मृत्यूनंतर पोलिसांनी प्रकरणाचा तपास आत्महत्येच्या अनुषंगाने केल्याचा आरोप पालकांनी केला आहे. मुलीच्या मृत्यूच्या धक्क्यात असताना पोलिसांनी एफआयआरमधील मजकूर व्यवस्थित न समजावता आपल्याकडून सह्या घेतल्याचा दावा त्यांनी तक्रारीत केला आहे.

‘आम्ही दुःखात होतो, कायदेशीर बाबींचे ज्ञान नव्हते. त्या अवस्थेचा गैरफायदा घेतला गेला,’ असा आरोप पालकांनी केला आहे.

मात्र, प्रत्यक्ष घटनाक्रम, संशयितांचे वर्तन आणि उपलब्ध पुरावे यांचा विचार करता हा केवळ आत्महत्येचा प्रकार नसून घातपाताची शक्यता तपासली जाणे अत्यावश्यक आहे, अशी त्यांची भूमिका आहे.

संशयितांच्या भूमिकेची सखोल चौकशी करण्याची मागणी

पालकांनी त्यांच्या तक्रारीत विजय उर्फ राज विलास बागुल याच्यासह काही व्यक्तींच्या भूमिकेबाबत संशय व्यक्त केला आहे. त्यांच्या म्हणण्यानुसार, विजय बागुल हा जयश्रीला मानसिक त्रास देत असल्याचे तसेच तिचा पाठलाग व धमकावण्याच्या घटना घडल्याचे त्यांनी पोलिसांना सांगितले होते. त्यामुळे त्याच्या भूमिकेची सखोल चौकशी करण्याची मागणी करण्यात आली आहे.
तसेच जयश्रीची जवळची मैत्रीण दीपाली आनंदा संदानशिव हिच्या भूमिकेबाबतही पालकांनी प्रश्न उपस्थित केले आहेत. १० डिसेंबर रोजी जयश्री बेपत्ता होण्यापूर्वी ती दीपालीच्या घरी गेली होती, त्यामुळे त्या काळात नेमके काय घडले, याची चौकशी करण्यात यावी, अशी मागणी पालकांनी केली आहे. याशिवाय पूर्वी जयश्रीने डेटॉल प्राशन केल्याची कथित घटना, त्याबाबतची माहिती आणि संबंधित पुराव्यांचीही तपासणी करण्याची मागणी करण्यात आली आहे.
तक्रारीत आणखी एका अज्ञात व्यक्तीच्या भूमिकेबाबत संशय व्यक्त करण्यात आला असून, संबंधित व्यक्ती व इतर संशयितांचे मोबाईल कॉल डिटेल रेकॉर्ड (CDR), मोबाईल टॉवर लोकेशन, डिजिटल संवाद व उपलब्ध इलेक्ट्रॉनिक पुरावे तपासण्यात यावेत, अशी मागणी पालकांनी केली आहे.
सदरहू FIR मध्ये BNS कलम १०३ व १०६ यांच्या समावेश करण्यात यावा.
तपास अधिकारी बदलण्याची मागणी पालकांनी केली आहे.

‘आमच्या मुलीचा आवाज आता आम्हीच बनणार’

जयश्री आज या जगात नाही. तिचा आवाज कायमचा शांत झाला आहे. मात्र, तिच्या आई-वडिलांच्या मनात एकच प्रश्न धगधगत आहे—‘आमच्या मुलीच्या मृत्यूमागचे खरे सत्य काय?’

“आमची मुलगी परत येणार नाही, हे कटू सत्य आम्ही स्वीकारले आहे. पण तिच्या मृत्यूचे सत्य आमच्यापासून लपून राहू नये. आमच्या जयश्रीला न्याय मिळाला पाहिजे. तिचा मृत्यू आत्महत्या होता की तिच्यासोबत काही घातपात झाला, हे निष्पक्ष तपासातून समोर आले पाहिजे,” अशी आर्त मागणी पालकांनी केली आहे.

‘न्याय मिळाला नाही, म्हणून आज उपोषणाचा मार्ग’

जयश्रीच्या मृत्यूला अनेक महिने उलटून गेले. विविध कार्यालयांमध्ये तक्रारी करूनही अपेक्षित न्याय मिळाला नसल्याचा आरोप कुटुंबीयांनी केला आहे. त्यामुळे अखेर न्याय मिळवण्यासाठी आज, १५ ऑगस्ट रोजी संदानशिव कुटुंबीय अमळनेर प्रांत कार्यालयासमोर आमरण उपोषणाला बसले आहे.

एकीकडे देश स्वातंत्र्य दिन साजरा करत असताना, दुसरीकडे एका आई-वडिलांना आपल्या मृत लेकीच्या न्यायासाठी उपोषणाला बसावे लागत असल्याचे चित्र अमळनेरमध्ये पाहायला मिळत आहे.

‘आमची जयश्री आता परत येणार नाही. तिच्या आठवणी घेऊन आम्हाला आयुष्य जगावे लागणार आहे. मात्र तिच्यासोबत नेमके काय घडले, हे सत्य समोर येणे गरजेचे आहे. आमच्या मुलीला न्याय मिळेपर्यंत आम्ही मागे हटणार नाही,’ अशी भावनिक भूमिका जयश्रीच्या आई-वडिलांनी घेतली आहे.

SIT चौकशी होईपर्यंत संघर्ष सुरूच ठेवण्याचा निर्धार

अमळनेर पोलीस ठाण्यातील तपासावर विश्वास उरला नसल्याचे सांगत सदर प्रकरणाचा तपास SIT अथवा Crime Branch कडे वर्ग करावा, अशी प्रमुख मागणी कुटुंबीयांनी केली आहे. तसेच तपासात हलगर्जीपणा करणाऱ्या संबंधित अधिकाऱ्यांची चौकशी करून दोष आढळल्यास कारवाई करावी, अशी मागणीही करण्यात आली आहे.

‘आमच्या मुलीचा आवाज आता शांत झाला आहे; तिच्यासाठी आवाज उठवणे ही आमची जबाबदारी आहे,’ असे म्हणत संदानशिव कुटुंबीयांनी न्यायाच्या मागणीसाठी उपोषण सुरू केले आहे. आता प्रशासन या उपोषणाची आणि पालकांच्या मागण्यांची कितपत गंभीर दखल घेते, याकडे अमळनेरसह संपूर्ण जिल्ह्याचे लक्ष लागले आहे.