सात दिवसांचा अल्टिमेटम! पाणी द्या, अन्यथा नगरपरिषदेवर मोर्चा काढणार; महिलांचा पाणीपट्टी वसुलीवर बहिष्कार टाकण्याचा इशारा…
प्रतिनिधी | अमळनेर : शहरातील वर्धमान नगर परिसरात कमी दाबाने पाणीपुरवठा होत असल्याने रहिवाशांना तीव्र पाणीटंचाईचा सामना करावा लागत आहे. पाण्याच्या अत्यल्प दाबामुळे तासाभराच्या पाणीपुरवठ्याच्या कालावधीतही केवळ १५ ते २० मिनिटेच पाणी मिळत असल्याची तक्रार स्थानिक महिलांनी केली आहे. या समस्येवर कायमस्वरूपी तोडगा काढण्याची मागणी करत महिलांनी आक्रमक भूमिका घेतली असून, पुढील सात दिवसांत नियमित पाणीपुरवठा सुरळीत न झाल्यास नगरपरिषदेवर मोर्चा काढण्याचा ठाम इशारा प्रशासनाला दिला आहे.
परिसरातील पाणीपुरवठ्याच्या समस्येबाबत स्थानिक नगरसेवक आणि नगरपरिषदेच्या अधिकाऱ्यांनी पाहणी केली होती. मात्र, पाहणीनंतरही परिस्थितीत अपेक्षित सुधारणा झालेली नसल्याने नागरिकांमध्ये नाराजी कायम आहे. केवळ पाहणी करून प्रश्न सुटणार नाही, तर प्रत्यक्षात पुरेशा दाबाने आणि नियमित पाणीपुरवठा होण्यासाठी ठोस उपाययोजना करणे आवश्यक असल्याची भूमिका महिलांनी मांडली आहे.
शेजारील भागात पुरेसे पाणी, मग आमच्यावरच अन्याय का?
सुंदर नगर आणि आल्हाद नगर परिसरातील नागरिकांना पुरेसे पाणी मिळत असताना, त्यालगत असलेल्या वर्धमान नगरातील रहिवाशांना मात्र पुरेसे पाणी मिळत नसल्याचा मुद्दा महिलांनी उपस्थित केला आहे. एकाच शहरातील शेजारील वस्त्यांमध्ये पाणीपुरवठ्याबाबत एवढी तफावत का, असा सवाल करत महिलांनी प्रशासनाच्या कार्यपद्धतीवर प्रश्नचिन्ह उपस्थित केले आहे. पाणीपट्टी वसूल करताना नागरिकांकडून पूर्ण रक्कम घेतली जाते; मग त्या मोबदल्यात पुरेसा पाणीपुरवठा का केला जात नाही, असा रोखठोक सवालही त्यांनी केला.
पाणीपट्टी भरणार नाही; महिलांचा आंदोलनाचा पवित्रा
पाणीपुरवठ्याची समस्या कायमस्वरूपी सोडविण्याऐवजी केवळ पाहणी केली जात असल्याची भावना नागरिकांमध्ये निर्माण झाली आहे. त्यामुळे यापुढेही पुरेसे पाणी मिळाले नाही, तर पाणीपट्टी भरणार नाही आणि पाणीपट्टी वसुलीवर बहिष्कार टाकू, असा इशारा महिलांनी दिला आहे. पाणी ही नागरिकांची मूलभूत गरज असून, त्यासाठी वारंवार तक्रारी करूनही दिलासा मिळत नसेल, तर आंदोलनाशिवाय पर्याय उरणार नाही, अशी भूमिका त्यांनी घेतली आहे.
वर्धमान नगरातील पाणीपुरवठ्याची समस्या पुढील सात दिवसांत सोडवून नागरिकांना पुरेशा दाबाने नियमित पाणी उपलब्ध करून द्यावे, अशी मागणी महिलांनी केली आहे. निर्धारित मुदतीत पाणीपुरवठा सुरळीत झाला नाही, तर नगरपरिषदेवर मोर्चा काढण्यात येईल, असा स्पष्ट इशारा त्यांनी प्रशासनाला दिला आहे.
त्यामुळे नगरपरिषद प्रशासन या तक्रारीची गांभीर्याने दखल घेऊन प्रत्यक्ष उपाययोजना करणार का आणि परिसरातील नागरिकांना पाणीटंचाईतून दिलासा मिळणार का, याकडे आता रहिवाशांचे लक्ष लागले आहे.
About the Author
