ग्रामीण बसगाड्या पाचपावली देवी माता मंदिराजवळून सुटणार; मुंबई, पुण्यासह लांब पल्ल्याच्या गाड्या आगारातूनच…
प्रतिनिधी | अमळनेर : अमळनेर बसस्थानकात सुरू असलेल्या विकासकामांमुळे ग्रामीण भागातील बसगाड्यांच्या सुटण्याच्या ठिकाणात बदल करण्यात येणार आहे. येत्या सोमवार-मंगळवारपासून ग्रामीण मार्गावरील बसगाड्या पाचपावली देवी माता मंदिराजवळील नवीन प्रशासकीय इमारतीच्या मागील परिसरातून सोडण्याचे नियोजन आहे. दरम्यान, धुळे, नाशिक, मुंबई, छत्रपती संभाजीनगर, इंदूर आणि सुरत यांसारख्या लांब पल्ल्याच्या मार्गावरील बसगाड्या अमळनेर आगारातूनच सुटणार असल्याची माहिती आगारप्रमुख राकेश शिवदे यांनी दिली.
ग्रामीण बसगाड्यांसाठी निश्चित केलेले पर्यायी ठिकाण उपविभागीय पोलीस अधिकारी यांच्या निवासस्थानाशेजारी आहे. त्यामुळे ग्रामीण भागातून शिक्षण, नोकरी, व्यवसाय आणि विविध कामांसाठी प्रवास करणाऱ्या नागरिकांनी बस सुटण्याच्या ठिकाणातील बदलाची नोंद घ्यावी, असे आवाहन करण्यात आले आहे.
अमळनेर बसस्थानकाच्या विकासासाठी यापूर्वी सुमारे आठ कोटी रुपयांच्या निधीतून वर्कशॉपसह विविध कामे हाती घेण्यात आली होती. ही कामे जवळपास पूर्णत्वाकडे आली असून, आता आणखी अडीच कोटी रुपयांच्या निधीतून संपूर्ण आगाराच्या विकासकामांना सुरुवात झाली आहे. बसस्थानक परिसरात काँक्रिटीकरण, पेव्हर ब्लॉक बसविणे, रंगरंगोटी आणि इतर कामे सुरू असल्याने बसगाड्यांच्या वाहतुकीचे नियोजन बदलण्यात येत आहे.
ग्रामीण बसगाड्यांचे सुटण्याचे ठिकाण बदलणार असले, तरी लांब पल्ल्याच्या बसगाड्या नेहमीप्रमाणे अमळनेर आगारातूनच सुटतील. त्यामुळे संबंधित मार्गांवरील प्रवाशांनी नेहमीच्या बसस्थानकातच बसची प्रतीक्षा करावी. प्रवाशांचा गोंधळ टाळण्यासाठी आगार व्यवस्थापनाने आवश्यक सूचना द्याव्यात, अशी अपेक्षा व्यक्त होत आहे.
विकासकामांच्या कालावधीत प्रवाशांची गैरसोय टाळण्यासाठी पर्यायी व्यवस्था करण्यात आली आहे. विशेषतः ग्रामीण भागातील विद्यार्थी, ज्येष्ठ नागरिक आणि दररोज प्रवास करणाऱ्या प्रवाशांनी बस सुटण्याचे ठिकाण आधीच निश्चित करून घ्यावे. तसेच, बदल लागू होण्याची अचूक तारीख आणि संबंधित मार्गावरील बसच्या उपलब्धतेबाबत अमळनेर आगाराशी संपर्क साधून खात्री करावी, असे आवाहन करण्यात आले आहे.
About the Author
